ஏறாவூர்ப்பிரதேசத்தில் பெரும் பரபரப்பை ஏற்படுத்தியுள்ள வழக்கு அடுத்த கட்ட விசாரணை 04.08.2023இல்

மட்டக்களப்பு -ஏறாவூர் பிரதேசத்திலுள்ள  பெண்கள் உயர்தர பாடசாலையொன்றில்   ஆங்கில பாடம் கற்பித்த ஆசிரியர் ஒருவர்         29 மாணவிகளுக்கு பாலியல் தொல்லை ஏற்படுத்தியதாக                    தாக்கல் செய்யப்பட்டுள்ள வழக்கு விசாரணை                    இரண்டாவது நாளாக நடைபெற்றது.
மட்டக்களப்பு மேலதிக நீதிபதியும் சுற்றுலா நீதிமன்ற  நீதிபதியுமான எஸ். அன்வர் சாதாத் முன்னிலையில் இவ்வழக்கு விசாரணை நடைபெற்றது.

இவ்வழக்கில் மாணவிகள் ஆசிரியைகள் , அதிபர் மற்றும் பிரதி அதிபர்   உட்பட நாற்பது பேருக்கு சாட்சியமளிப்பதற்கு நீதிமன்றினால்      அழைப்பானை விடுக்கப்பட்டுள்ளது.
சாட்சியங்கள் கட்டம் கட்டமாக பதிவு செய்யப்படுகிறன. முதலாம் நாள் ஐவரது சாட்சியங்களும் இரண்டாம் நாள் பத்துப்பேரது சாட்சியங்களும் பதிவு செய்யப்பட்டன.

சந்தேகநபர் சார்பில் சட்டத்தரணிகள் எவரும் ஆஜராகவில்லை.        இதனைக் கருத்திற்கொண்டு ஒவ்வொரு சாட்சியமும் பதிவுசெய்யப்பட்டதையடுத்து  சாட்சியைக் குறுக்குக் கேள்விகேட்பதற்கு சந்தர்ப்பம் வழங்கப்பட்டது.

எனினும் சந்தேக நபர் மௌனமாகவே நின்றார். இதனால் நீதிபதி சந்தேக நபருக்கு அறிவுரை வழங்கினார். ‘இவ்வழக்கு விசாரணைக்கு எடுக்கப்பட முன்னரே சட்டத்தரணியை அமர்த்துவதற்கு தங்களுக்கு இரண்டு வாரகால அவகாசம் வழங்கப்பட்டது. ஆனால் நீங்கள் சட்டத்தரணிகள் எவரையும் அமர்த்தவில்லை. இன்னும் உங்களுக்கு சந்தர்ப்பம் வழங்க முடியும்.  சட்டத்தரணியை அமர்த்துங்கள் அல்லது சாட்சிகளை குறுக்கேள்வி கேட்டு உங்களது நியாயங்களை மன்றிற்குத்  தெரிவியுங்கள். தனிப்பட்டமுறையில் எவரையும் குற்றவாளியாகக் காண்பதற்கு நீதிமன்றிற்கு அவசியமில்லை என்றார். எனவே அடுத்த கட்ட விசாரணையின்போது சட்டத்தரணியை அமர்த்துமாறு நீதிபதி கேட்டுக்கொண்டார்.

பாடசாலை மாணவிகள்  சீருடையில் மன்றிற்கு சமுகமளித்திருந்தனர். தங்களுக்கு ஏற்பட்ட அசௌகரியங்கள் மற்றும் பாலியல் தொல்லை தொடர்பாக வாக்குமூலம் அளித்தனர்.