மட்டு மாநகரசபைக்குட்பட்ட பகுதிகளில் சுகாதார நடைமுறைகளைப் பின்பற்றாத வர்த்தக நிலையங்கள் மூடபப்படும்.

மட்டக்களப்பு மாநகரசபைக்குட்பட்ட பகுதிகளில் சுகாதார நடைமுறைகளைப் பின்பற்றாத வர்த்தக நிலையங்கள் மூடப்படுவதுடன்,  உரிமையாளர்களுக்கு எதிராக சட்ட நடவடிக்கை எடுக்கப்படும் என மட்டக்களப்பு மாநகரசபை முதல்வர் தி.சரவணபவன் தெரிவித்துள்ளார்.

மட்டக்களப்பு மாநகர சபைக்குட்பட்ட பகுதியில் கொரோனா அச்சுறுத்தலைத் தவிர்க்கும் வகையிலான நடவடிக்கைகளை முன்னெடுப்பதற்குத் தேவையான நடவடிக்கைகளை மேற்கொள்வது குறித்து ஆராயும் கூட்டம் இன்று மட்டக்களப்பு மாநகர சபையில் நடைபெற்றது.மட்டக்களப்பு மாநகர முதல்வர் தி.சரவணபவன் தலைமையில் நடைபெற்ற இந்த கலந்துரையாடலில் மட்டக்களப்பு மாநகர சபையின் பிரதி முதல்வர் க.சத்தியசீலன், மாநகர ஆணையாளர் மா.தயாபரன், மன்முனை வடக்கு உதவி பிரதேச செயலாளர்  க.அருணன், மட்டக்களப்பு மாவட்ட பிராந்திய சுகாதார திணைக்களத்தின் தொற்றியல் வைத்திய பொறுப்பதிகாரி டாக்டர் குணநாயகம், மட்டக்களப்பு பிராந்திய சுகாதார வைத்திய அதிகாரி டாக்டர் க.கிரிசுதன், மாநகர சுகாதார நிலையியற் குழுவின் தலைவர் சிவம் பாக்கியநாதன் உட்பட பொலிஸ் திணைக்கள அதிகாரிகள், பொதுச் சுகாதார பரிசோதகர்கள், வர்த்தக சங்க பிரதிநிதிகள் எனப் பலரும் கலந்து கொண்டிருந்தனர்.

கிழக்கு மாகாணத்தில் கொரோனா தொற்றின் வேகம் அதிகரித்து வருவதன் காரணமாக கொரோனா தொற்று ஏற்பட்டுள்ள பகுதிகளிலிருந்து மட்டக்களப்பு மாநகர சபைக்குட்பட்ட பகுதிகளில் வியாபார நடவடிக்கைகளில் ஈடுபடுபவர்களைக் கட்டுப்படுத்துவது மற்றும் அப்பகுதிகளிலிருந்து வரும் மக்களை கண்காணிப்பது தொடர்பில் இங்கு ஆராயப்பட்டது .

குறிப்பாக காத்தான்குடி பகுதிகளில் தற்போது கொரோனா தொற்று ஏற்பட்டுள்ளதன் காரணமாக அங்கிருந்து வரும் வர்த்தகர்களைக் கட்டுப்படுத்தும் வகையில் மட்டக்களப்பு மாநகர சபைக்குட்பட்ட பகுதிகளில் வர்த்தக நடவடிக்கைகளை முன்னெடுப்பவர்கள் மாநகருக்குள்ளேயே தங்கியிருந்து வியாபார நடவடிக்கைகளில் ஈடுபட அனுமதிப்பது எனவும் தங்குமிட வசதிகள் இல்லாதவர்களை மாநகரத்திற்குள் வர்த்தக நடவடிக்கைகளில் ஈடுபடுவதைத் தற்காலிகமாகத் தவிர்த்துக்கொள்வது எனவும் இங்கு தீர்மானிக்கப்பட்டது .

காத்தான்குடியில் இருந்து வர்த்தக நிலையங்களுக்கு வருகை தருபவர்கள் சுகாதார பரிசோதகர்களின் அறிவுறுத்தலின் படி இங்கேயே தங்கி இருந்து கடைகளை திறக்கவேண்டும் எனவும் அல்லாதுவிடின் நகருக்குள் வசிக்கும் ஊழியர்களைக் கொண்டு வியாபார நடவடிக்கைகளை முன்னெடுக்குமாறும் பணிக்கப்பட்டுள்ளதாக இதன்போது மாநகர முதல்வர் தெரிவித்தார்.

மேலும் வர்த்தக சங்கம் இதற்கான பூரண ஒத்துழைப்பினை வழங்கவேண்டும் என்றும் இங்கு தங்குபவர்களுக்கான வசதிகளை ஏற்படுத்திக் கொடுப்பதோடு அது தொடர்பில் இன்று மாலைக்குள் பொதுச்சுகாதார பரிசோதகர்கள் களவிஜயம் செய்து உறுதிப்படுத்தியதன் பின்னர் அவரது வியாபார செயற்பாடுகளுக்கு மாநகரசபை அனுமதி வழங்கும் என்றும் தெரிவித்தார்