இராணுவ ஆட்சி எச்சரிக்கும் சந்திரிக்கா

தற்போதைய சூழ்நிலையில் நாட்டில் இராணுவ ஆட்சி அமுல்படுத்தப்படும் என இலங்கையின் முன்னாள் ஜனாதிபதி சந்திரிக்கா பண்டாரநாயக்க குமாரதுங்க எச்சரித்துள்ளார்.

ஸ்ரீலங்கா பொதுஜன பெரமுனவின் (SLPP) அரசியல்வாதிகள் மற்றும் அரசாங்கத்துடன் தொடர்புடையவர்களின் வாகனங்கள் மற்றும் வீடுகளை பொதுமக்கள் தாக்கியதையடுத்து  நேற்று அமைதியின்மை ஏற்பட்டதை தொடர்ந்து அவரது எச்சரிக்கை வந்துள்ளது.

ஜனாதிபதி மற்றும் அரசாங்கத்திற்கு எதிராக கடந்த சில வாரங்களாக அலரிமாளிகைக்கு அருகாமையிலும், கொழும்பு காலிமுகத்திடலிலும் அமைதியான முறையில் போராட்டத்தில் ஈடுபட்டு வந்த பொதுமக்கள் மீது SLPP ஆதரவாளர்கள் நேற்று தாக்குதல் நடத்தியதை அடுத்து இந்த அமைதியின்மை ஏற்பட்டது.

இச்சம்பவம் தொடர்பில் கருத்து தெரிவித்த இலங்கையின் முன்னாள் ஜனாதிபதி பொதுமக்களிடம் வேண்டுகோள் ஒன்றை விடுத்துள்ளார்.

“நீதி மற்றும் ஜனநாயக ஆட்சிக்காக மிகவும் அமைதியான முறையில் அற்புதமான போராட்டத்தை நடத்திய நமது குடிமக்கள் அனைவருக்கும், இராணுவ ஆட்சிக்கு வழி வகுக்கும் வகையில் வன்முறையைத் தூண்டுவதற்கு நாசகாரர்கள் பயன்படுத்தப்படலாம் என்பதை கவனத்தில் கொள்ளுமாறு கேட்டுக்கொள்கிறேன்.” அவர் ட்வீட் செய்துள்ளார்.

இந்த ஆபத்தை தடுத்து நிறுத்துவதற்கு பொதுமக்கள் தமது நிறுவனத் திறன்களைப் பயன்படுத்துமாறும் சந்திரிக்கா பண்டாரநாயக்க குமாரதுங்க கேட்டுக் கொண்டார்.