திருகோணமலை மாவட்டத்திற்கான தேர்தல் முன்னேற்பாடுகள் அனைத்தும் பூர்த்தி

நாளைய இடம்பெறவுள்ள பாராளுமன்ற தேர்தலுக்காக திருகோணமலை மாவட்டத்திற்கான தேர்தல் முன்னேற்பாடுகள் அனைத்தும் பூர்த்திசெய்யப்பட்டுள்ளதாக திருகோணமலை மாவட்ட தெரிவத்தாட்சி அலுவலரும் அரசாங்க அதிபருமான ஜே.எஸ்.டி.எம்.அசங்க அபேவர்தன தெரிவித்தார்.

மாவட்ட செயலகத்தில் இன்று மாலை ஊடகவியலாளர்களை சந்தித்து மாவட்ட தேர்தல் நிலமைகள் பற்றி எடுத்துரைத்தார்.

இம்முறை திருகோணமலை தேர்தல் மாவட்டத்தில் மொத்தமாக 288,868 வாக்காளர்கள் வாக்களிக்க தகுதி பெற்றுள்ளனர். அவர்களது வாக்குப்பதிவிற்காக 307 வாக்குச்சாவடிகள் அமைக்கப்பட்டுள்ளது.

அனைத்து வாக்குச்சாவடிகளுக்குமான வாக்குப்பெட்டிகள் மற்றும் வாக்குச்சீட்டுகள் என்பன அனுப்பிவைக்கும் நடவடிக்கைகள் அனைத்தும் காலை பூர்த்தி செய்யப்பட்டுள்ளது.

அனைத்து பகுதிகளுக்குமான பாதுகாப்புகள் பலப்படுத்தப்பட்டுள்ளதுடன் அதற்காக முப்படையினர் கடமையில் ஈடுபடுத்தப்பட்டுள்ளது.

குறித்த நடவடிக்கைகள் அனைத்தும் சுகாதார சேவையினர்களது மேற்பார்வையின் கீழ் நடைமுறைப்படுத்தப்பட்டுள்ளதாகவும் தேர்தலின் முன்னரும் பின்னரும் அனைத்து வாக்குச்சாவடிகளிலும் தொற்று நீக்கல் செய்வதற்கான அனைத்து முன்னேற்பாடுகளும் செய்யப்பட்டுள்ளதாகவும் நாளை வாக்களிப்பு நடவடிக்கைகள் முன்னெடுக்கப்பட்ட பின்னர் வாக்குப் பெட்டிகள் அனைத்தும் வாக்கெண்ணும் நிலையத்திற்கு கொண்டுவரப்பட்டு அங்கு பாதுகாப்பாக வைக்கப்பட்டு வாக்கெண்ணும் நடவடிக்கைகள் அனைத்தும் நாளை மறுதினம் காலை முதல் ஆரம்பிக்கப்படும் என அவர் தெரிவித்தார்.

திருகோணமலையை பிரதிநிதித்துவப்படுத்தும் 4 பாராளுமன்ற உறுப்பினர்களுக்காக இம்முறை பதிவுசெய்யப்பட்ட கட்சிகள் 13 மற்றும் 14 சுயேட்சைக் குழுக்களும் போட்டியிடுகின்றமை குறிப்பிடத்தக்கது.